ನಂದಿ ಬೆಟ್ಟದ ಶ್ರೇಣಿಯಲ್ಲಿ ಭವಿಷ್ಯದ ಜಲ ಭದ್ರತೆ:ಅರ್ಕಾವತಿ ಸೇರಿ ಆರು ನದಿಗಳ ಮರುಜೀವ ಯೋಜನೆಗೆ ರಾಮಲಿಂಗಾರೆಡ್ಡಿ ಚಾಲನೆ

ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನ ಭವಿಷ್ಯದ ನೀರಿನ ದಾಹವನ್ನು ತಣಿಸಲು ಮತ್ತು ಅಂತರ್ಜಲ ಮಟ್ಟವನ್ನು ಹೆಚ್ಚಿಸಲು ಕರ್ನಾಟಕ ಅರಣ್ಯ ಇಲಾಖೆ ಮಹತ್ತರ ಹೆಜ್ಜೆಯೊಂದನ್ನು ಇಟ್ಟಿದೆ. ಬೆಂಗಳೂರಿನ ಜೀವನಾಡಿಯಾಗಿರುವ ನಂದಿ ಬೆಟ್ಟದ ಶ್ರೇಣಿಯಲ್ಲಿ ಭವಿಷ್ಯದ ಜಲ ಭದ್ರತೆಗಾಗಿ ‘ಜಲಾನಯನ ಪ್ರದೇಶಗಳಿಗಾಗಿ ಅರಣ್ಯಗಳು: ನಂದಿ ಬೆಟ್ಟಗಳ ಯೋಜನೆ’ಗೆ ಚಾಲನೆ ನೀಡಲಾಗಿದೆ.

ವಿಶ್ವದ ಪ್ರಮುಖ ತಂತ್ರಜ್ಞಾನ ಸಂಸ್ಥೆ ‘ಸೇಲ್ಸ್‌ಫೋರ್ಸ್’, ‘ಅಯೋರಾ ಇಕೋಲಜಿಕಲ್ ಟ್ರಸ್ಟ್’ ಮತ್ತು ‘KFWCCF’ ಸಂಸ್ಥೆಗಳ ಜೊತೆಗೂಡಿ ಅರಣ್ಯ ಇಲಾಖೆ ಈ ಹಸಿರು ಕ್ರಾಂತಿಗೆ ಮುನ್ನುಡಿ ಬರೆದಿದೆ. ಅರಣ್ಯ ಮತ್ತು ಪರಿಸರ ಸಚಿವರಾದ ರಾಮಲಿಂಗಾರೆಡ್ಡಿ  ಈ ಯೋಜನೆಗೆ ಅಧಿಕೃತವಾಗಿ ಚಾಲನೆ ನೀಡಿದ್ದಾರೆ.

600 ಹೆಕ್ಟೇರ್ ಕಾಡಿಗೆ ಮರುಜೀವ; 1.80 ಲಕ್ಷ ಗಿಡಗಳ ನೆಡುತೋಪು

ವೇಗದ ನಗರೀಕರಣ ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ನಂದಿ ಬೆಟ್ಟದ ಪರಿಸರ ವ್ಯವಸ್ಥೆ ದಿನದಿಂದ ದಿನಕ್ಕೆ ಕ್ಷೀಣಿಸುತ್ತಿದೆ. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಸರ್ಕಾರ, ಮುಂದಿನ 3 ವರ್ಷಗಳಲ್ಲಿ ಒಟ್ಟು 600 ಹೆಕ್ಟೇರ್ ಅರಣ್ಯ ಪ್ರದೇಶವನ್ನು ಸಂಪೂರ್ಣವಾಗಿ ನೈಸರ್ಗಿಕ ಒಣ-ಪರ್ಣಪಾತಿ (Dry Deciduous) ಕಾಡುಗಳನ್ನಾಗಿ ಪರಿವರ್ತಿಸಲು ನಿರ್ಧರಿಸಿದೆ. ಈ ಅವಧಿಯಲ್ಲಿ ಬರೋಬ್ಬರಿ 1,80,000 ಸ್ಥಳೀಯ ತಳಿಯ ಸಸ್ಯಗಳನ್ನು ನೆಟ್ಟು ಪೋಷಿಸುವ ಬೃಹತ್ ಗುರಿ ಹೊಂದಲಾಗಿದೆ. ಆ ಮೂಲಕ ನಂದಿ ಬೆಟ್ಟದ ಕಳೆದುಹೋದ ಹಸಿರು ವೈಭವವನ್ನು ಮರಳಿ ತರಲಾಗುವುದು.

ಆರು ನದಿಗಳ ಉಗಮಸ್ಥಾನಕ್ಕೆ ರಕ್ಷಣೆ ಕವಚ

ಬೆಂಗಳೂರು ಮತ್ತು ಸುತ್ತಮುತ್ತಲಿನ ಜಿಲ್ಲೆಗಳಿಗೆ ನೀರುಣಿಸುವ ಆರು ಪ್ರಮುಖ ನದಿಗಳಾದ ಆರ್ಕಾವತಿ, ಚಿತ್ರಾವತಿ, ಪಾಪಾಗ್ನಿ, ಉತ್ತರ ಪಿನಾಕಿನಿ (ಪೆನ್ನಾರ್), ದಕ್ಷಿಣ ಪಿನಾಕಿನಿ (ಪೊನ್ನೈಯಾರ್) ಮತ್ತು ಪಾಲಾರ್ ನದಿಗಳು ನಂದಿ ಬೆಟ್ಟದ ಸಾಲಿನಲ್ಲಿಯೇ ಉಗಮಿಸುತ್ತವೆ. ಈ ನದಿಗಳ ಜಲಾನಯನ ಪ್ರದೇಶಗಳು (Watersheds) ಒಣಗಿ ಹೋಗದಂತೆ ತಡೆಯುವುದು ಈ ಯೋಜನೆಯ ಮೂಲ ಆಶಯವಾಗಿದೆ. ಇಲ್ಲಿ ಹಸಿರು ವಲಯ ನಿರ್ಮಾಣವಾಗುವುದರಿಂದ ಮಣ್ಣಿನ ತೇವಾಂಶ ಹೆಚ್ಚಿ, ನದಿ ಮೂಲಗಳಿಗೆ ಮರುಜೀವ ಸಿಗಲಿದೆ.

ಕೇವಲ ಗಿಡ ನೆಡುವುದಷ್ಟೇ ಅಲ್ಲ, ಇದು ಬಹುಮುಖಿ ಯೋಜನೆ!

ಈ ಯೋಜನೆ ಕೇವಲ ಸಸಿ ನೆಡುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ. ಬದಲಿಗೆ ವೈಜ್ಞಾನಿಕವಾಗಿ ಕಾಡನ್ನು ರಕ್ಷಿಸುವ ಹಲವು ಆಯಾಮಗಳನ್ನು ಒಳಗೊಂಡಿದೆ:

ಮಣ್ಣು ಮತ್ತು ತೇವಾಂಶ ಸಂರಕ್ಷಣೆ: ಮಳೆ ನೀರು ವ್ಯರ್ಥವಾಗಿ ಹರಿದು ಹೋಗದಂತೆ ತಡೆದು, ಭೂಮಿ ತಾಯಿಯ ಒಡಲು ಸೇರುವಂತೆ ಮಾಡುವುದು.

ಆಕ್ರಮಣಕಾರಿ ಸಸ್ಯಗಳ ನಿಯಂತ್ರಣ: ಕಾಡಿನ ನೈಸರ್ಗಿಕ ಬೆಳವಣಿಗೆಗೆ ಮಾರಕವಾಗಿರುವ ವಿದೇಶಿ ಅಥವಾ ಆಕ್ರಮಣಕಾರಿ ಕಳೆ ಸಸ್ಯಗಳನ್ನು ಗುರುತಿಸಿ ನಾಶಪಡಿಸುವುದು.

ಸ್ಥಳೀಯರಿಗೆ ಉದ್ಯೋಗ ಆಸರೆ: ಈ ಯೋಜನೆಯ ಮೂಲಕ ಸ್ಥಳೀಯ ಸಮುದಾಯಗಳಿಗೆ ಸುಸ್ಥಿರ ಜೀವೋಪಾಯದ ಅವಕಾಶಗಳನ್ನು ಕಲ್ಪಿಸಲಾಗುತ್ತಿದೆ. ಇದು ಪರಿಸರ ರಕ್ಷಣೆಯಲ್ಲಿ ಸಾರ್ವಜನಿಕರ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸಲಿದೆ.

ಕಾರ್ಯಕ್ರಮದಲ್ಲಿ ಅರಣ್ಯ ಪಡೆಗಳ ಮುಖ್ಯಸ್ಥರಾದ (PCCF) ಮೀನಾಕ್ಷಿ ನೇಗಿ ಸೇರಿದಂತೆ ಇಲಾಖೆಯ ಹಿರಿಯ ಅಧಿಕಾರಿಗಳು ಭಾಗವಹಿಸಿ, ಯೋಜನೆಯ ಯಶಸ್ಸಿಗೆ ನೀಲನಕ್ಷೆ ಸಿದ್ಧಪಡಿಸಿದ್ದಾರೆ. ಕಾಂಕ್ರೀಟ್ ಕಾಡಾಗುತ್ತಿರುವ ಬೆಂಗಳೂರಿಗೆ ನಂದಿ ಬೆಟ್ಟದ ಈ ಹಸಿರು ಯೋಜನೆ ಮುಂಬರುವ ದಿನಗಳಲ್ಲಿ ಸಂಜೀವಿನಿಯಾಗಲು ವೇದಿಕೆ ಒದಗಿಸಲಿದೆ ಎನ್ನುವುದರಲ್ಲಿ ಸಂಶಯವಿಲ್ಲ.