IFFI 2026: ‘ಧುರಂಧರ್’, ‘ರಾಮಾಯಣ’ ಚಿತ್ರಗಳಿಗೆ ವಿಶೇಷ ಸ್ಥಾನ

ನವದೆಹಲಿ: 57ನೇ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ (IFFI) ನವೆಂಬರ್ 20ರಿಂದ 28ರವರೆಗೆ ನಡೆಯಲಿದೆ. ಈ ಬಾರಿಯ ‘ಇಂಡಿಯನ್ ಪನೋರಮಾ’ ವಿಭಾಗಕ್ಕೆ ‘ಧುರಂಧರ್’ ಉದ್ಘಾಟನಾ ಚಿತ್ರವಾಗಿದ್ದು, ಬ್ರಿಕ್ಸ್ ವಿಭಾಗದಲ್ಲಿ ‘ರಾಮಾಯಣ: ಪಾರ್ಟ್ 1’ ಮೊದಲ ಚಿತ್ರವಾಗಿ ಪ್ರದರ್ಶನಗೊಳ್ಳಲಿದೆ. ಲಡಾಖಿ ಭಾಷೆಯ ‘ಬಿಕಮಿಂಗ್’ ನಾನ್-ಫೀಚರ್ ವಿಭಾಗಕ್ಕೆ ಚಾಲನೆ ನೀಡಲಿದೆ.

‘ಗಡಿಗಳಿಲ್ಲದ ಕಥೆಗಳು’ ಈ ಬಾರಿಯ ಚಿತ್ರೋತ್ಸವದ ಥೀಮ್ ಆಗಿದ್ದು, ನಿರ್ದೇಶಕ ಅಶುತೋಷ್ ಗೋವಾರಿಕರ್ ಚಿತ್ರೋತ್ಸವದ ನಿರ್ದೇಶಕರಾಗಿದ್ದಾರೆ.

ಒಟ್ಟು 87 ದೇಶಗಳ 159 ಅಂತಾರಾಷ್ಟ್ರೀಯ ಹಾಗೂ 18 ಭಾಷೆಗಳ 76 ಭಾರತೀಯ ಸಿನಿಮಾಗಳು ಪ್ರದರ್ಶನಕ್ಕೆ ಆಯ್ಕೆಯಾಗಿವೆ. ಪೋಲಿಷ್ ಸಿನಿಮಾ ‘ಫಾದರ್‌ಲ್ಯಾಂಡ್’ ಉದ್ಘಾಟನಾ ಚಿತ್ರವಾಗಿದ್ದು, ಸಿಂಗಾಪುರದ ‘ವಿ ಆರ್ ಆಲ್ ಸ್ಟ್ರೇಂಜರ್ಸ್’ ಸಮಾರೋಪ ಚಿತ್ರವಾಗಿದೆ.

ಸ್ಪೇನ್‌ಗೆ ‘ಕಂಟ್ರಿ ಆಫ್ ಆನರ್’ ಗೌರವ ನೀಡಲಾಗಿದೆ. ರಷ್ಯಾ ಪಾಲುದಾರ ರಾಷ್ಟ್ರವಾಗಿದೆ. ಈ ಬಾರಿ ಅನಿಮೇಷನ್ ಮತ್ತು ‘ಫಿಲ್ಮ್ಸ್ ಅಬೌಟ್ ಫಿಲ್ಮ್ಸ್’ ಎಂಬ ಎರಡು ಹೊಸ ವಿಭಾಗಗಳನ್ನೂ ಪರಿಚಯಿಸಲಾಗಿದೆ.