ಬೆಂಗಳೂರು ಮಳೆಗೆ ಕಂಗಾಲಾಗಬೇಡಿ: ಜಲಾವೃತ, ಮರ ಬಿದ್ದರೆ ತಕ್ಷಣ ಈ ನಂಬರ್‌ಗಳಿಗೆ ಕರೆ ಮಾಡಿ!

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಪ್ರೀ-ಮಾನ್ಸೂನ್ ಮಳೆ ಭಾರಿ ಅವಾಂತರಗಳನ್ನು ಸೃಷ್ಟಿಸುತ್ತಿರುವ ಬೆನ್ನಲ್ಲೇ, ನಾಗರಿಕರ ನೆರವಿಗಾಗಿ ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ತುರ್ತು ಸಹಾಯವಾಣಿ ಸಂಖ್ಯೆಗಳನ್ನು ಅಧಿಕೃತವಾಗಿ ಬಿಡುಗಡೆ ಮಾಡಿದೆ.

ನಗರದ ವಿವಿಧ ಭಾಗಗಳಲ್ಲಿ ಜಲಾವೃತ, ಮರಗಳು ಧರಾಶಾಹಿಯಾಗುವುದು ಸೇರಿದಂತೆ ಮಳೆಸಂಬಂಧಿತ ಯಾವುದೇ ರೀತಿಯ ನಾಗರಿಕ ಸಮಸ್ಯೆಗಳು ಎದುರಾದಲ್ಲಿ ಸಾರ್ವಜನಿಕರು ತಕ್ಷಣವೇ ಈ ಸಂಖ್ಯೆಗಳನ್ನು ಸಂಪರ್ಕಿಸಿ ದೂರು ದಾಖಲಿಸಬಹುದಾಗಿದೆ. ಮುಂಬರುವ ದಿನಗಳಲ್ಲೂ ಮಳೆ ಮುಂದುವರಿಯುವ ಮುನ್ಸೂಚನೆ ಇರುವುದರಿಂದ ಇಡೀ ಸರ್ಕಾರಿ ಯಂತ್ರ ಸನ್ನದ್ಧವಾಗಿದ್ದು, ನಾಗರಿಕರು ಕೂಡ ಅಲರ್ಟ್ ಆಗಿರುವಂತೆ ಜಿಬಿಎ ಮುಖ್ಯ ಆಯುಕ್ತರು ಮನವಿ ಮಾಡಿದ್ದಾರೆ.

ನಗರದ ಪ್ರಮುಖ ಭಾಗಗಳಲ್ಲಿ ಉಂಟಾಗುವ ಸಮಸ್ಯೆಗಳನ್ನು ತ್ವರಿತವಾಗಿ ಪರಿಹರಿಸಲು ಜಿಬಿಎ ಟೋಲ್-ಫ್ರೀ ಐಸಿಸಿಸಿ ಸಹಾಯವಾಣಿ ಸಂಖ್ಯೆ 1533 ಅನ್ನು ಹಾಗೂ ಲ್ಯಾಂಡ್‌ಲೈನ್ ಸಂಖ್ಯೆ 080-22221188 ಅನ್ನು ಸಾರ್ವಜನಿಕ ಬಳಕೆಗೆ ಮುಕ್ತಗೊಳಿಸಲಾಗಿದೆ. ರಸ್ತೆಗಳಲ್ಲಿ ನೀರು ನಿಲ್ಲುವುದು, ಅಪಾಯಕಾರಿ ಗುಂಡಿಗಳು, ಬಿರುಗಾಳಿಗೆ ಉರುಳಿ ಬೀಳುವ ಮರಗಳು ಮತ್ತು ರೆಂಬೆಗಳು, ಬೀದಿ ದೀಪಗಳ ಕೈಕೊಡುವುದು ಹಾಗೂ ಕಸದ ವಿಲೇವಾರಿಗೆ ಸಂಬಂಧಿಸಿದ ದೂರುಗಳನ್ನು ಈ ಸಹಾಯವಾಣಿಗಳ ಮೂಲಕ ನೇರವಾಗಿ ನಿಯಂತ್ರಣ ಕೊಠಡಿಗೆ ತಲುಪಿಸಬಹುದಾಗಿದೆ. ಇದರೊಂದಿಗೆ ಮಳೆಗಾಲದಲ್ಲಿ ಹರಡಬಹುದಾದ ಸಾಂಕ್ರಾಮಿಕ ರೋಗಗಳನ್ನು ತಡೆಗಟ್ಟಲು ಸೊಳ್ಳೆಗಳ ನಿಯಂತ್ರಣ ಮತ್ತು ಇತರೆ ನಾಗರಿಕ ದೂರುಗಳಿಗೂ ಇಲ್ಲಿ ತಕ್ಷಣದ ಸ್ಪಂದನೆ ಸಿಗಲಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ನಗರದ ವಿಸ್ತಾರವನ್ನು ಗಮನದಲ್ಲಿಟ್ಟುಕೊಂಡು ವಲಯವಾರು ನಿಯಂತ್ರಣ ಕೊಠಡಿಗಳ ಸಂಖ್ಯೆಗಳನ್ನು ಬಿಡುಗಡೆ ಮಾಡಲಾಗಿದ್ದು, ಬೆಂಗಳೂರು ಸೆಂಟ್ರಲ್ ಭಾಗದ ಸಾರ್ವಜನಿಕರು 9480685702 ಸಂಖ್ಯೆಯನ್ನು ಸಂಪರ್ಕಿಸಬಹುದಾಗಿದೆ. ಬೆಂಗಳೂರು ದಕ್ಷಿಣ ಭಾಗದ ನಿರಂತರ ನೆರವಿಗಾಗಿ 080-26566362 ಮತ್ತು 9480685704 ಸಂಖ್ಯೆಗಳು ಲಭ್ಯವಿವೆ. ಬೆಂಗಳೂರು ಪಶ್ಚಿಮ ವಲಯಕ್ಕೆ ಸಂಬಂಧಿಸಿದಂತೆ 080-23561692, 080-23463366 ಹಾಗೂ 9480685703 ಸಂಖ್ಯೆಗಳನ್ನು ಸನ್ನದ್ಧ ಸ್ಥಿತಿಯಲ್ಲಿಡಲಾಗಿದೆ. ಅದೇ ರೀತಿ ಬೆಂಗಳೂರು ಪೂರ್ವ ಭಾಗದ ನಾಗರಿಕರು 9480685706, 080-28512300 ಮತ್ತು 080-28512301 ಸಂಖ್ಯೆಗಳನ್ನು ಹಾಗೂ ಬೆಂಗಳೂರು ಉತ್ತರ ಭಾಗದ ವ್ಯಾಪ್ತಿಗೆ ಬರುವ ಸಾರ್ವಜನಿಕರು 9480685705, 080-28636671 ಮತ್ತು 080-22975936 ಸಂಖ್ಯೆಗಳನ್ನು ತುರ್ತು ಸಂದರ್ಭಗಳಲ್ಲಿ ಬಳಸಿಕೊಳ್ಳಲು ಕೋರಲಾಗಿದೆ. ಈ ಮಳೆಗಾಲದಲ್ಲಿ ಸುರಕ್ಷಿತ ಮತ್ತು ಸುಂದರ ಬೆಂಗಳೂರನ್ನು ನಿರ್ಮಿಸಲು ನಾಗರಿಕರು ಆಡಳಿತದೊಂದಿಗೆ ಕೈಜೋಡಿಸಬೇಕು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.