ಕೆಎಸ್‌ಆರ್‌ಟಿಸಿ ಮತ್ತು ಬಿಎಂಟಿಸಿ ಡಿಪೋಗಳಿಗೆ ದರ ನಿಯಂತ್ರಣ ಸಮಿತಿ ಭೇಟಿ: ಕಾರ್ಯಾಚರಣೆ ಹಾಗೂ ಆರ್ಥಿಕ ಸ್ಥಿತಿಗತಿ ಕುರಿತು ಸಾರಿಗೆ ಸಂಸ್ಥೆಗಳ ಉನ್ನತಾಧಿಕಾರಿಗಳೊಂದಿಗೆ ಮಹತ್ವದ ಚರ್ಚೆ

ಬೆಂಗಳೂರು: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ (KSRTC) ಮತ್ತು ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಗಳ (BMTC) ಒಟ್ಟಾರೆ ಕಾರ್ಯಾಚರಣೆಯ ಮಾನದಂಡಗಳನ್ನು ಪರಿಶೀಲಿಸುವ ಹಾಗೂ ಆರ್ಥಿಕ ಪ್ರಗತಿಯನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ‘ದರ ನಿಯಂತ್ರಣ ಸಮಿತಿ’ಯ ಉನ್ನತ ನಿಯೋಗವು ಪ್ರಮುಖ ಡಿಪೋಗಳಿಗೆ ಭೇಟಿ ನೀಡಿ ಮಹತ್ವದ ಅಧ್ಯಯನ ನಡೆಸಿದೆ.

ಸಮಿತಿಯ ಅಧ್ಯಕ್ಷರಾದ ಅತುಲ್ ಕುಮಾರ್ ತಿವಾರಿ (ನಿವೃತ್ತ ಐಎಎಸ್ ಅಧಿಕಾರಿ) ಅವರ ನೇತೃತ್ವದಲ್ಲಿ ನಡೆದ ಈ ಭೇಟಿಯಲ್ಲಿ, ಸಮಿತಿಯ ಸದಸ್ಯರಾದ ಐಐಎಸ್‌ಸಿ (IISC) ಪ್ರಾಧ್ಯಾಪಕ ಡಾ. ಅಬ್ದುಲ್ ಪಿಂಜಾರಿ ಮತ್ತು ದ್ವಾರಕನಾಥ್ ಬಾಬು ಅವರು ಉಪಸ್ಥಿತರಿದ್ದು ಪ್ರಮುಖ ತಾಂತ್ರಿಕ ಹಾಗೂ ಆರ್ಥಿಕ ವಿಷಯಗಳ ಕುರಿತು ಚರ್ಚಿಸಿದರು.

ಕಾರ್ಯಾಚರಣೆ ಸುಧಾರಣೆ ಹಾಗೂ ಆರ್ಥಿಕ ಸಮತೋಲನದ ಚರ್ಚೆ:

ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಗಳ (SRTUs) ಪ್ರಸ್ತುತ ಸ್ಥಿತಿಗತಿಯ ಕುರಿತು ನಿಖರವಾದ ಪ್ರಾಥಮಿಕ (First hand) ಮಾಹಿತಿಯನ್ನು ಪಡೆಯುವುದು ಈ ಜಂಟಿ ಭೇಟಿಯ ಮುಖ್ಯ ಉದ್ದೇಶವಾಗಿತ್ತು. ಸಭೆಯಲ್ಲಿ ಮುಖ್ಯವಾಗಿ ಎರಡೂ ಸಾರಿಗೆ ನಿಗಮಗಳ ನಡುವಿನ ಪರಸ್ಪರ ಸಮನ್ವಯತೆ, ಸಾರ್ವಜನಿಕರಿಗೆ ಅನುಕೂಲವಾಗುವಂತೆ ಬಸ್ ಮಾರ್ಗಗಳ ತರ್ಕಬದ್ಧಗೊಳಿಸುವಿಕೆ (Route Rationalization) ಹಾಗೂ ಸಾರಿಗೆ ಸಂಸ್ಥೆಗಳ ವೆಚ್ಚದ ಮಾನದಂಡಗಳ ಕುರಿತು ಸುದೀರ್ಘ ಚರ್ಚೆ ನಡೆಸಲಾಯಿತು. ಇದರೊಂದಿಗೆ, ನಿಗಮಗಳು ಆರ್ಥಿಕವಾಗಿ ‘ಬ್ರೇಕ್-ಈವನ್’ (ಲಾಭ-ನಷ್ಟ ಸಮಸ್ಥಿತಿ) ಸಾಧಿಸುವಲ್ಲಿ ಎದುರಿಸುತ್ತಿರುವ ಕೊರತೆಗಳು ಮತ್ತು ಅದಕ್ಕೆ ಪ್ರಮುಖ ಕಾರಣಗಳನ್ನು ಸಮಿತಿಯು ಪರಾಮರ್ಶಿಸಿತು. ಸರ್ಕಾರದ ವಿವಿಧ ಸಹಾಯಧನ ಯೋಜನೆಗಳು ಮತ್ತು ಅನುದಾನಗಳ ಸಮರ್ಪಕ ಬಳಕೆಯ ಬಗ್ಗೆಯೂ ಈ ವೇಳೆ ಸಮಾಲೋಚನೆ ನಡೆಸಲಾಯಿತು.

ಇವಿ ವಾಹನಗಳ ಜೀವಿತಾವಧಿ ವೆಚ್ಚದ ಪರಾಮರ್ಶೆ:

ಬದಲಾಗುತ್ತಿರುವ ಸಾರಿಗೆ ತಂತ್ರಜ್ಞಾನಕ್ಕೆ ಅನುಗುಣವಾಗಿ, ಪರಿಸರ ಸ್ನೇಹಿ ಎಲೆಕ್ಟ್ರಿಕ್ ವಾಹನಗಳ (EV) ಕಾರ್ಯಾಚರಣೆಯ ಮಾನದಂಡಗಳ ಬಗ್ಗೆ ಸಮಿತಿ ವಿಶೇಷ ಆಸಕ್ತಿ ವಹಿಸಿತು. ಸಾಂಪ್ರದಾಯಿಕ ಡೀಸೆಲ್ ಬಸ್‌ಗಳಿಗೆ ಹೋಲಿಸಿದರೆ ಎಲೆಕ್ಟ್ರಿಕ್ ಬಸ್‌ಗಳ ಒಟ್ಟಾರೆ ಜೀವಿತಾವಧಿ ವೆಚ್ಚ (Life cycle cost) ಎಷ್ಟಾಗಲಿದೆ ಎಂಬ ತಾಂತ್ರಿಕ ಅಂಶಗಳನ್ನು ವಿಶ್ಲೇಷಿಸಲಾಯಿತು. ಇದರ ಅಂಗವಾಗಿ ನಗರ ಸಂಚಾರದ ವಿದ್ಯುತ್ ಚಾಲಿತ ವಾಹನಗಳು ಹಾಗೂ ಅತ್ಯಾಧುನಿಕ ಚಾರ್ಜಿಂಗ್ ಮೂಲಸೌಕರ್ಯ ವ್ಯವಸ್ಥೆಯನ್ನು ಹೊಂದಿರುವ ಬಿಎಂಟಿಸಿ ಡಿಪೋ-3 ಕ್ಕೆ ಸಮಿತಿ ಭೇಟಿ ನೀಡಿತು. ಹಾಗೆಯೇ, ಅಂತಾರಾಜ್ಯ ಮತ್ತು ರಾಜ್ಯದೊಳಗಿನ ದೂರದ ಪ್ರಯಾಣಕ್ಕಾಗಿ ಪ್ರೀಮಿಯಂ ಸೇವಾ ಬಸ್‌ಗಳನ್ನು ನಿರ್ವಹಿಸುವ ಕೆಎಸ್‌ಆರ್‌ಟಿಸಿಯ ಡಿಪೋ-4 ಕ್ಕೂ ಭೇಟಿ ನೀಡಿ ಪರಿಶೀಲಿಸಿತು. ಜೊತೆಗೆ ನಿಗಮದ ವಾಣಿಜ್ಯ ಚಟುವಟಿಕೆಗಳ ಪ್ರಗತಿಯನ್ನು ವೀಕ್ಷಿಸಿತು.

ಉನ್ನತ ಮಟ್ಟದ ಅಧಿಕಾರಿಗಳ ಉಪಸ್ಥಿತಿ:

ಈ ಉನ್ನತ ಮಟ್ಟದ ಪರಿಶೀಲನಾ ಸಭೆ ಹಾಗೂ ಡಿಪೋ ಭೇಟಿಯ ಸಂದರ್ಭದಲ್ಲಿ ಕೆಎಸ್‌ಆರ್‌ಟಿಸಿ ವ್ಯವಸ್ಥಾಪಕ ನಿರ್ದೇಶಕರಾದ ಶಿವಕುಮಾರ್ ಕೆ.ಬಿ. (IAS), ಬಿಎಂಟಿಸಿ ವ್ಯವಸ್ಥಾಪಕ ನಿರ್ದೇಶಕರಾದ ರಘುನಂದನ್ ಮೂರ್ತಿ (IAS), ಬಿಎಂಟಿಸಿ ನಿರ್ದೇಶಕರಾದ (ಭದ್ರತೆ ಮತ್ತು ಜಾಗೃತ ದಳ) ಅಬ್ದುಲ್ ಅಹದ್ (IPS), ಕೆಎಸ್‌ಆರ್‌ಟಿಸಿ ನಿರ್ದೇಶಕರಾದ (ಸಿಬ್ಬಂದಿ ಮತ್ತು ಜಾಗೃತ ದಳ) ಗಾಯಿತ್ರಿ ಕೆ.ಎಂ. (IAS) ಸೇರಿದಂತೆ ಕೆಎಸ್‌ಆರ್‌ಟಿಸಿ ಮತ್ತು ಬಿಎಂಟಿಸಿ ಸಂಸ್ಥೆಗಳ ಮುಖ್ಯ ಸಂಚಾರ ವ್ಯವಸ್ಥಾಪಕರು ಹಾಗೂ ಇತರೆ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದು ಸಮಿತಿಗೆ ಅಗತ್ಯ ಮಾಹಿತಿಗಳನ್ನು ಒದಗಿಸಿದರು.