ವೇದಿಕೆಯಲ್ಲಿ ಆರಾಧ್ಯ ದೈವಕ್ಕೆ ಭಕ್ತಿಪೂರ್ವಕ ಪ್ರಣಾಮ: ವೀರ ಗಂಗಾಧರ ಅಜ್ಜನ ಫೋಟೋ ಮುಟ್ಟಿ ನಮಸ್ಕರಿಸಿ ಪ್ರಮಾಣ ವಚನ ಸ್ವೀಕರಿಸಿದ ಡಿ.ಕೆ. ಶಿವಕುಮಾರ್!

ಬೆಂಗಳೂರು: ಲೋಕಭವನದ ಗ್ಲಾಸ್ ಹೌಸ್‌ನಲ್ಲಿ ನಡೆದ ಕರ್ನಾಟಕದ ನೂತನ ಮುಖ್ಯಮಂತ್ರಿಗಳ ಪದಗ್ರಹಣ ಸಮಾರಂಭವು ಅತ್ಯಂತ ಅಪೂರ್ವ ಹಾಗೂ ಧಾರ್ಮಿಕ ಲೇಪನವಿರುವ ಸಾಂಪ್ರದಾಯಿಕ ಕ್ಷಣಗಳಿಗೆ ಸಾಕ್ಷಿಯಾಗಿದೆ. ರಾಜ್ಯದ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲು ವೇದಿಕೆಯ ಮೇಲಿದ್ದ ಉದ್ಘೋಷಕರು ಡಿ.ಕೆ. ಶಿವಕುಮಾರ್ ಅವರ ಹೆಸರು ಪ್ರಕಟಿಸುತ್ತಿದ್ದಂತೆ, ಅವರು ನೇರವಾಗಿ ಆಡಳಿತ ಪೀಠದತ್ತ ತೆರಳದೆ ತಮ್ಮ ಆರಾಧ್ಯ ದೈವಕ್ಕೆ ಭಕ್ತಿ ಸಮರ್ಪಿಸಿದ್ದು ನೆರೆದಿದ್ದ ಎಲ್ಲರ ಗಮನ ಸೆಳೆಯಿತು.

ವೇದಿಕೆಯ ಮುಂಭಾಗದಲ್ಲಿ ಅತ್ಯಂತ ಗೌರವಪೂರ್ವಕವಾಗಿ ಇರಿಸಲಾಗಿದ್ದ ರಂಭಾಪುರಿ ಪೀಠದ ಜಗದ್ಗುರುಗಳಾಗಿದ್ದ ವೀರ ಗಂಗಾಧರ ಅಜ್ಜ ಅವರ ಭಾವಚಿತ್ರದ ಬಳಿಗೆ ಮೊದಲು ತೆರಳಿದ ಡಿ.ಕೆ. ಶಿವಕುಮಾರ್, ಭಾವಚಿತ್ರದ ಪಾದ ಮುಟ್ಟಿ ಅತ್ಯಂತ ಭಾವುಕರಾಗಿ ನಮಸ್ಕರಿಸಿದರು. ತಮ್ಮ ಜೀವನದ ಪ್ರತಿಯೊಂದು ಕಷ್ಟದ ಹಂತದಲ್ಲೂ ತಮಗೆ ಶ್ರೀರಕ್ಷೆಯಾಗಿ ಮುನ್ನಡೆಸಿದ ಗುರುಗಳ ಪಾದಕ್ಕೆ ಶಿರಬಾಗಿ ಪ್ರಾರ್ಥಿಸಿದ ನಂತರವಷ್ಟೇ ಅವರು ರಾಜ್ಯಪಾಲರ ಸಮ್ಮುಖಕ್ಕೆ ಬಂದು ನಿಂತರು.

ಈ ಭಕ್ತಿಪೂರ್ವಕ ನಮನದ ಬಳಿಕ ಸಂವಿಧಾನದ ಪ್ರತಿಯನ್ನು ಕೈಯಲ್ಲಿ ಹಿಡಿದುಕೊಂಡ ನೂತನ ಮುಖ್ಯಮಂತ್ರಿಗಳು, ತಮ್ಮ ಆರಾಧ್ಯ ದೈವ ವೀರ ಗಂಗಾಧರ ಅಜ್ಜನ ಹೆಸರಿನಲ್ಲೇ ಭಾವುಕರಾಗಿ ಪ್ರಮಾಣ ವಚನ ಸ್ವೀಕರಿಸಿದರು. ಅಧಿಕಾರ ಸ್ವೀಕರಿಸುವ ಮುನ್ನ ತಳಮಟ್ಟದ ಸಂಸ್ಕಾರ ಹಾಗೂ ಆಧ್ಯಾತ್ಮಿಕ ನಂಬಿಕೆಯನ್ನು ಪ್ರದರ್ಶಿಸಿದ ಅವರ ಈ ವಿಶಿಷ್ಟ ನಡೆಗೆ ಸಮಾರಂಭದಲ್ಲಿದ್ದ ಗಣ್ಯರು ಹಾಗೂ ಮಠಾಧೀಶರು ತಲೆದೂಗಿದರು. ರಾಜ್ಯದ 230 ಪ್ರಮುಖ ಬಸ್ ನಿಲ್ದಾಣಗಳಲ್ಲಿ ನೇರ ಪ್ರಸಾರದ ಮೂಲಕ ಈ ದೃಶ್ಯವನ್ನು ಕಣ್ತುಂಬಿಕೊಂಡ ಲಕ್ಷಾಂತರ ಅಭಿಮಾನಿಗಳು ಹಾಗೂ ಜನಸಾಮಾನ್ಯರು ನೂತನ ಸಾರಥಿಯ ಭಕ್ತಿಭಾವಕ್ಕೆ ಹರ್ಷ ವ್ಯಕ್ತಪಡಿಸಿದ್ದಾರೆ.