ಕರ್ನಾಟಕದ ನಯಾಗರ ಫಾಲ್ಸ್ ಆದ ಜೋಗ ಜಲಪಾತ!

ಬೆಂಗಳೂರು: ವಿಶ್ವವಿಖ್ಯಾತ ಜೋಗ ಜಲಪಾತ ಇದೀಗ ಕರ್ನಾಟಕದ ನಯಾಗರಾ ಫಾಲ್ಸ್ ಆಗಿದೆ.ಲಿಂಗನಮಕ್ಕಿ ಜಲಾಶಯದಿಂದ ನೀರು ಬಿಟ್ಟಿರುವ ಹಿನ್ನಲೆಯಲ್ಲಿ ಜಲಪಾತ ನಯಾಗರದಂತೆ ದುಮ್ಮಿಕ್ಕುತ್ತಿದ್ದು ಪ್ರವಾಸಿಗರನ್ನು ಕೈ ಬೀಸಿ ಕರೆಯುತ್ತಿದೆ.

ಮಲೆನಾಡಿನಲ್ಲಿ ವರ್ಷಧಾರೆ ಮುಂದುವರೆದಿದ್ದು ಸಹ್ಯಾದ್ರಿಯ ಗಿರಿ ಶಿಖರಗಳ ಹಸಿರು ಸಿರಿಯ ಕಾನನದ ನಡುವೆ ಧುಮ್ಮಿಕ್ಕುವ ಜೋಗ ಜಲಪಾತದ ರಮಣೀಯ ದೃಶ್ಯ ನೋಡುಗರನ್ನು ಮಂತ್ರ ಮುಗ್ದರನ್ನಾನಿಗಿಸುತ್ತಿದೆ. ಕಾಡು, ಬೆಟ್ಟ, ಕಣಿವೆ, ಜಲಧಾರೆ, ಝರಿ, ತೊರೆ ಮುಂತಾದ ವೈವಿದ್ಯಮಯ ಪ್ರಕೃತಿ ಸೊಬಗನ್ನು ಮೈಗೂಡಿಸಿಕೊಂಡಿರುವ ಈ ಜಲಧಾರೆಯ ಮನಮೋಹಕ ದೃಶ್ಯ ಪ್ರವಾಸಿಗರನ್ನು ಪುಳಕಿತರನ್ನಾಗಿಸುತ್ತದೆ.

ಕಳೆದ ಎರಡು ಮೂರು ವರ್ಷ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆ ಬಾರದ ಹಿನ್ನೆಲೆಯಲ್ಲಿ ಕಳೆಗುಂದಿದ್ದು ಜೋಗ ಜಲಪಾತ ಇದೀಗ ಮಲೆನಾಡಿನಲ್ಲಿ ಮುಂದುವರೆದ ವರ್ಷಧಾರೆ ಹಿನ್ನೆಲೆಯಲ್ಲಿ ವೈಯಾರದಿಂದ ದುಮ್ಮಿಕ್ಕುತ್ತಿದೆ.ಬಾರಂಗಿ, ಬಾಣಾವತಿ, ಬಾರಗಂಗಾ, ಗೇರುಸೊಪ್ಪಾ ಹೊಳೆ ಎಂಬ ವಿವಿಧ ಹೆಸರುಗಳಿಂದ ಕರೆಯಲ್ಪಡುವ ಶರಾವತಿ ನದಿ ಪಶ್ಚಿಮ ಘಟ್ಟದಲ್ಲಿ ಹರಿಯುವ ಪ್ರಮುಖ ನದಿ. 956 ಅಡಿ ಆಳದ ಪ್ರಪಾತದ ಕಗ್ಗಲ್ಲ ಮೇಲೆ ಬಾಗಿ ಚತುರ್ಮುಖಗಳಾಗಿ ಬೀಳುವ ದೃಶ್ಯದ ಎದುರು ನಿಂತವನ ಎದೆಯಲ್ಲಿ ಕಂಪನದ ಅಲೆ ಏಳುವುದು ಖಂಡಿತ.

ಗಾಂಭೀರ್ಯವನ್ನು ಮೈವೆತ್ತ ರಾಜ, ವೈಯಾರತೆಯ ಜೊತೆಗೆ ತುಸು ಮೆಲುವಿನ ವೇಗವನ್ನು ಮೈಗೂಡಿಸಿಕೊಂಡು ಬೀಳುವ ರಾಣಿ, ಭೋರ್ಗರೆಯುವ ರೋರರ್, ಶರವೇಗದ ರಾಕೇಟ್ ದುಮ್ಮಿಕ್ಕುವ ದೃಶ್ಯ ನೋಡಲು ಮೈ ನವಿರೇಳುತ್ತದೆ. ಆದರೆ ಲಿಂಗನಮಕ್ಕಿ ಜಲಾಶಯದಿಂದ ನದಿಗೆ ನೀರು ಬಿಟ್ಟಿರುವ ಕಾರಣ ನಾಲ್ಕು ಕವಲಾಗಿ ಬೀಳಬೇಕಾದ ಜಲಧಾರೆ ಇಡೀ ಜಲಪಾತವನ್ನೇ ಆವರಿಸಿದೆ.ಅಮೆರಿಕಾದ ನಯಾಗರಾ ಫಾಲ್ಸ್ ಮಾದರಿಯಲ್ಲಿ ದುಮ್ಮಿಕ್ಕುತ್ತಿದೆ.ಕರ್ನಾಟಕದ ನಯಾಗರ ಫಾಲ್ಸ್ ಎಂದು ಕರೆಸಿಕೊಳ್ಳುತ್ತಿದೆ.

ಪ್ರಕೃತಿದತ್ತ ಕೊಡುಗೆಯ ನೈಜ ಸೃಷ್ಠಿಯ ಜಲಪಾತದ ಅದ್ಭುತ ದೃಶ್ಯ ನೋಡಲು ನಯನ ಮನೋಹಕವಾಗಿದ್ದು ಎರಡು ಕಣ್ಣು ಸಾಲದಂತಾಗಿದೆ. ಇಳೆಗೂ-ಬಾನಿಗೂ ಆವರಿಸಿಕೊಂಡ ತಿಳಿ ಬಿಳಿಯ ಮಂಜಿನ ಮೋಡ, ಸುತ್ತಲಿನ ಪ್ರಪಂಚವನ್ನೇ ಮರೆಸುತ್ತದೆ. ಸುರಿಯುವ ಮಳೆಯ ನಡುವೆ ಆಗೊಮ್ಮೆ ಈಗೊಮ್ಮೆ ಮೋಡ ಸರಿದು ಹಾಲ್ನೊರೆಂಯಂತೆ ದುಮ್ಮಿಕ್ಕುವ ಜಲಧಾರೆಗಳು ಕಂಡು ಮಾಯವಾಗುವ ದೃಶ್ಯ ಅವಿಸ್ಮರಣೀಯ.

ವಿಶ್ವವಿಖ್ಯಾತ ಜಲಧಾರೆ ತನ್ನ ಖ್ಯಾತಿಗೆ ತಕ್ಕಂತೆ ದೇಶ-ವಿದೇಶದಿಂದ ಪ್ರವಾಸಿಗರನ್ನು ಆಕರ್ಷಿಸುತ್ತಿದ್ದು ಎಡೆ ಬಿಡದೆ ಸುರಿಯುತ್ತಿರುವ ಮಳೆಯ ನಡುವೆಯೂ ಸಾವಿರಾರು ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುತ್ತಿದ್ದಾರೆ. ಮಂಜಿನಿಂದ ಮುಚ್ಚಿದ ಜಲಧಾರೆ, ಆಗೊಮ್ಮೆ ಈಗೊಮ್ಮೆ ತನ್ನ ಚಲುವನ್ನು ಆನಾವರಣಗೊಳಿಸುವ ದೃಶ್ಯವನ್ನು ಸವಿಯುವ ಪ್ರವಾಸಿಗರು ದಿಡೀರ್ ಸುರಿಯುವ ವರ್ಷಧಾರೆಗೆ ನೆನೆಯುತ್ತಾ ಸೂರು ಹುಡುಕಿದರೆ ಅಲ್ಲಿನ ಪರಿಸರದಲ್ಲಿ ಸ್ವಚ್ಛಂದವಾಗಿ ತಿರುಗಾಡಿಕೊಂಡಿರುವ ವಾನರ ಸೈನ್ಯ ತನ್ನ ಮರಿಗಳನ್ನು ಮಳೆಯಿಂದ ರಕ್ಷಿಸಲು ತನ್ನ ಒಡಲನ್ನೇ ಸೂರನ್ನಾಗಿ ಮಾಡಿಕೊಳ್ಳುವ ದೃಶ್ಯ ಮನುಷ್ಯರನ್ನು ನಾಚಿಸುವಂತಿದೆ.

ಜೋಗ ಜಲಪಾತ ವೀಕ್ಷಣೆಗೆ ದೇಶ-ವಿದೇಶದಿಂದ ಬಂದಿದ್ದ ಪ್ರವಾಸಿಗರು ಸುದ್ದಿಲೋಕ ತಂಡದ ಜೊತೆ ಮಾತನಾಡಿ, ಜಲಧಾರೆಯನ್ನು ಕೊಂಡಾಡಿದರು. ವಿಶ್ವವಿಖ್ಯಾತ ಜೋಗ ಜಲಪಾತದ ದೃಶ್ಯವೈಭವ ತಮ್ಮನ್ನು ಮಂತ್ರ ಮುಗ್ದರನ್ನಾಗಿಸಿದೆ, ಸುರಿಯುವ ಮಳೆಯ ನಡುವೆ ಆಗೊಮ್ಮೆ-ಈಗೊಮ್ಮ ಅನಾವರಣಗೊಳ್ಳುವ ಹಾಲ್ನೊರೆಯಂತಹ ನಾಲ್ಕು ಜಲಧಾರೆಗಳನ್ನು ವೀಕ್ಷಿಸಲು ತುಂಬಾ ಖುಷಿಯಾಗುತ್ತಿದೆ ಎಂದು ತಮ್ಮ ಅನುಭವ ಹಂಚಿಕೊಂಡರು.

ಜಲಾಶಯದಿಂದ ನೀರನ್ನು ಹರಿಸುವುದು ಮುಂದುವರೆದಿದ್ದು ಜೋಗಜಲಪಾತ ಅನನ್ಯ ಸೌಂದರ್ಯದಿಂದ‌ ಕಣ್ಮನ‌ ಸೂರೆಗೊಳ್ಳುತ್ತಿದೆ.ಮಳೆ ಕಡಿಮೆಯಾಗಿ ಜಲಾಶಯದಿಂದ ನೀರು ಹರಿಸುವುದನ್ನು ನಿಲ್ಲಿಸುವ ಮೊದಲು ನೀವೂ ಒಮ್ಮೆ ಜೋಗಜಲಪಾದತ ದೃಶ್ಯ ವೈಭವವನ್ನು ಕಣ್ತುಂಬಿಕೊಳ್ಳಿ.