ಪರಮ್ ಫೌಂಡೇಶನ್‌ನಿಂದ ಭಕ್ತಿಯ ಗಾನ ಸುಧೆ: ಗಾಯಕಿ ಶಿವಶ್ರೀ ಸ್ಕಂದಪ್ರಸಾದ್‌ ಮಾರ್ಗದರ್ಶನದ ಕಾರ್ಯಾಗಾರ ಯಶಸ್ವಿ

ಬೆಂಗಳೂರು: ನಗರದ “ಪರಮ್ ಫೌಂಡೇಶನ್” ಆಯೋಜಿಸಿದ್ದ ಮೂರು ದಿನಗಳ ‘ಭಜ ಮನ’ ಪೂರ್ವ-ಸಂಗೀತ ಕಾರ್ಯಾಗಾರವು (Bhaja Mana Pre-Concert Workshop) ಅತ್ಯಂತ ಯಶಸ್ವಿಯಾಗಿ ಮುಕ್ತಾಯಗೊಂಡಿತು. ʻಪ್ರಸಿದ್ಧ ಗಾಯಕಿ ಶಿವಶ್ರೀ ಸ್ಕಂದಪ್ರಸಾದ್ʼ ಅವರ ಮಾರ್ಗದರ್ಶನದಲ್ಲಿ ನಡೆದ ಈ ಕಾರ್ಯಾಗಾರದಲ್ಲಿ ನಗರದಾದ್ಯಂತ 6ರಿಂದ 60 ವರ್ಷ ವಯೋಮಾನದ 50ಕ್ಕೂ ಹೆಚ್ಚು ಉತ್ಸಾಹಿ ಸಂಗೀತಾಸಕ್ತರು ಭಾಗವಹಿಸಿದ್ದರು.

ಈ ಯುಗದಲ್ಲಿ ಭಗವಂತನ ನಾಮವನ್ನು ಶುದ್ಧ ಭಕ್ತಿಯಿಂದ ಹಾಡುವುದರ ಜೊತೆಗೆ ನಿತ್ಯ ಸ್ಮರಣೆ ಮಾಡುವುದು ಒಂದು ಸರಳ ತಪಸ್ಸಿನ ಮಾದರಿಯಾಗಿದೆ. ಇಂಥದ್ದೊಂದು ನಂಬಿಕೆಯೊಂದಿಗೆ ಈ ಕಾರ್ಯಾಗಾರವನ್ನು “ದೇವಾಲಯ”ದ ವಾತಾವರಣವನ್ನು ಸೃಷ್ಟಿಸಿ ಆಯೋಜಿಸಲಾಗಿತ್ತು. ನವೆಂಬರ್ 18, 19 ಮತ್ತು 20ರಂದು ಸಂಜೆ ಸಮಯದಲ್ಲಿ ಜಯನಗರದ ಸನಾತನ ಕಲಾಕ್ಷೇತ್ರದಲ್ಲಿ ಕಾರ್ಯಾಗಾರವನ್ನು ನಡೆಸಲಾಯಿತು. ಈ ಕಾರ್ಯಾಗಾರದಲ್ಲಿ ಭಾಗವಹಿಸಿದ್ದವರು, ಶಿವಶ್ರೀ ಸ್ಕಂದಪ್ರಸಾದ್ ಅವರಿಂದ ದಾಸರಪದಗಳು, ಅಭಂಗ್‌ಗಳು ಮತ್ತು ಭಜನೆಗಳನ್ನು ನೇರವಾಗಿ ಕಲಿತರು. ಇದರ ಜೊತೆಗೆ ಅವುಗಳ ಆಧ್ಯಾತ್ಮಿಕ ಮತ್ತು ಸಾಂಸ್ಕೃತಿಕ ಒಳನೋಟವನ್ನು ಆಂತರ್ಯವನ್ನೂ ಅರಿತುಕೊಂಡರು. ಇಲ್ಲಿ ಭಾಗವಹಿಸಿದ್ದ ಸಂಗೀತಾಸಕ್ತರು ಸಂಗೀತದ ಬಗ್ಗೆ ಮಾತ್ರವಲ್ಲದೆ, ಈ ಸಂಯೋಜನೆಗಳ ಹಿಂದಿನ ನಿಜವಾದ ಭಕ್ತಿಯನ್ನು ಸಂವಾದಾತ್ಮಕ ಪ್ರಶ್ನೋತ್ತರ ಅವಧಿಗಳ ಮೂಲಕ ಮತ್ತಷ್ಟು ಅರಿತುಕೊಂಡರು.

ಶಿವಶ್ರೀ ಜತೆ ಗಾಯನ:

ಈ ಕಾರ್ಯಾಗಾರದಲ್ಲಿ ಭಾಗವಹಿಸಿದವರಿಗೆ ವಿಶೇಷ ಅವಕಾಶವೊಂದನ್ನು ಕಲ್ಪಿಸಲಾಗಿದ್ದು, ಬೆಂಗಳೂರಿನ ಕುಮಾರನ್ಸ್  ಶಾಲೆಯ ಆವರಣದಲ್ಲಿರುವ ಮೀನಾಕ್ಷಿ ರಂಗಮಂಚದಲ್ಲಿ ನವೆಂಬರ್ 22ರಂದು ಸಂಜೆ 5 ಗಂಟೆಯಿಂದ ಏರ್ಪಡಿಸಲಾಗಿರುವ ಮುಖ್ಯ ಕಾರ್ಯಕ್ರಮವಾದ ‘ಭಜ ಮನ –ಭಕ್ತಿ ಸಂಗೀತ ಸಂಜೆ’ಯಲ್ಲಿ ಶಿವಶ್ರೀ ಅವರೊಂದಿಗೆ ವೇದಿಕೆ ಹಂಚಿಕೊಂಡು ಭಕ್ತಿ ಗೀತೆಯನ್ನು ಹಾಡಲಿದ್ದಾರೆ.

ಕಾರ್ಯಗಾರಕ್ಕೆ ಅಪಾರ ಮೆಚ್ಚುಗೆ:

ಈಗಾಗಲೇ ಮೂರು ದಿನಗಳ ಕಾಲ ನಡೆದಿರುವ ಕಾರ್ಯಾಗಾರದ ಬಗ್ಗೆ ಅಪಾರ ಮೆಚ್ಚುಗೆಯ ಮಾತುಗಳು ವ್ಯಕ್ತವಾಗಿವೆ. ಇದು ನಿಜಕ್ಕೂ ಅರ್ಥಪೂರ್ಣ ಹಾಗೂ ಕಲಿಕಾ ಶಿಬಿರವಾಗಿತ್ತು ಎಂಬುದಾಗಿ ಭಾಗವಹಿಸಿದವರು ಶ್ಲಾಘಿಸಿದ್ದಾರೆ. ಹಲವರು ಈ ಕಾರ್ಯಾಗಾರವನ್ನು ಭಕ್ತಿ ಸಂಗೀತದೊಂದಿಗಿನ ತಮ್ಮ ಪಯಣಕ್ಕೆ ಮತ್ತಷ್ಟು ಸ್ಪೂರ್ತಿ ನೀಡಿದೆ ಎಂದು ಬಣ್ಣಿಸಿದ್ದಾರೆ. ಕಾರ್ಯಾಗಾರವನ್ನು ನಿಜಕ್ಕೂ ಸ್ಮರಣೀಯವಾಗಿಸಿದ ಸಂಗೀತಾಸಕ್ತ ಭಾಗೀದಾರರಿಗೆ ಪರಮ್ ಫೌಂಡೇಶನ್ ತನ್ನ ಕೃತಜ್ಞತೆಯನ್ನು ಸಲ್ಲಿಸಿದೆ.