ವಿಶ್ವಾಸಮತ ಗೆದ್ದ ಮೋದಿ ಸರಕಾರ: ಕಾಂಗ್ರೆಸ್ ಗೆ ಭಾರೀ ಮುಖಭಂಗ

ಫೋಟೋ ಕೃಪೆ:ಲೋಕಸಭಾ ಟಿವಿ(ಟ್ವಿಟ್ಟರ್)

ನವದೆಹಲಿ:ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರದ ಎನ್‌ಡಿಎ ಸರಕಾರ ವಿಶ್ವಾಸಮತ ಗೆಲ್ಲುವಲ್ಲಿ ಯಶಸ್ವಿಯಾಗಿದ್ದು ಅವಿಶ್ವಾಸ ನಿರ್ಣಯ ಮಂಡಿಸಿದ್ದ ಕಾಂಗ್ರೆಸ್ ಪಕ್ಷಕ್ಕೆ ಭಾರೀ ಮುಖಭಂಗವಾಗಿದೆ.

ಆಂಧ್ರಪ್ರದೇಶಕ್ಕೆ ವಿಶೇಷ ಸ್ಥಾನಮಾನ ನೀಡುವ ವಿಚಾರ ಸಂಬಂಧ ಟಿಡಿಪಿ ಪಕ್ಷದ ಅವಿಶ್ವಾಸ ನಿರ್ಣಯದ ನಿಲುವನ್ನು ಬಲಿಸಿ ವಿರೋಧಪಕ್ಷಗಳು ಮಂಡಿಸಿದ್ದ ಅವಿಶ್ವಾಸ ಗೊತ್ತುವಳಿಯಲ್ಲಿ ನಿರೀಕ್ಷೆಯಂತೆ ಬಿಜೆಪಿ ನೇತೃತ್ವದ ಎನ್‌ಡಿಎ ಗೆಲುವು‌ ಸಾಧಿಸಿತು.

ಲೋಕಸಭೆಯಲ್ಲಿ ಅವಿಶ್ವಾಸ ನಿರ್ಣಯದ ಮೇಲೆ ನಡೆದ ಸುಧೀರ್ಘ ಚರ್ಚೆ ನಂತರ ಗೊತ್ತುವಳಿಯನ್ನು ಮತಕ್ಕೆ ಹಾಕಲಾಯಿತು.ಸದನದಲ್ಲಿ‌ ಹಾಜರಿದ್ದ 451 ಸದಸ್ಯರು ಮತ ಚಲಾವಣೆ ಮಾಡಿದರು. ಎನ್‌ಡಿಎ 325 ಹಾಗೂ ಕಾಂಗ್ರೆಸ್‌ ಮೈತ್ರಿಕೂಟದ ಪರವಾಗಿ ಕೇವಲ126 ಮತ ಚಲಾವಣೆಯಾಗಿದವು. ಬಹುಮತ ಸಾಬೀತಿಗೆ 226 ಮಾತ್ರ ಬೇಕಾಗಿತ್ತು. ಆದರೆ ನಿರೀಕ್ಷೆಗೂ ಹೆಚ್ಚಿನ ಮತಗಳು ಮೋದಿ ಸರಕಾರದ ಪರ ಬಿದ್ದವು.ಹೀಗಾಗಿ ಮೋದಿ ಸರಕಾರ 199 ಮತಗಳ ಅಂತರದಿಂದ ಗೆಲುವು ಪಡೆಯಿತು.

ಕೇಸಿನೇನಿ ಶ್ರೀನಿವಾಸರೆಡ್ಡಿ ಮಂಡಿಸಿದ್ದ ಅವಿಶ್ವಾಸ ನಿರ್ಣಯಕ್ಕೆ ದೊಡ್ಡ ಅಂತರದ ಸೋಲಾಗಿದ್ದು ಅವಿಶ್ವಾಸ ನಿರ್ಣಯ ಮಂಡಿಸಿದ್ದ ಕಾಂಗ್ರೆಸ್ ಭಾರೀ ಮುಖಭಂಗವನ್ನು ಅನುಭವಿಸಿತು.