13 ವರ್ಷಗಳ ಬಳಿಕ ಅರುಣಾಚಲ ಪ್ರದೇಶಕ್ಕೆ ಮರಳಿದ ಬುದ್ಧನ ಅವಶೇಷಗಳು; ದರ್ಶನಕ್ಕಾಗಿ ತವಾಂಗ್ ಮಠಕ್ಕೆ ಹರಿದುಬಂದ ಭಕ್ತ ಸಾಗರ

ಇಟಾನಗರ: ಶಾಕ್ಯಮುನಿ ಬುದ್ಧನ ಪವಿತ್ರ ಅವಶೇಷಗಳ ದರ್ಶನ ಪಡೆಯಲು 21 ಸಾವಿರಕ್ಕೂ ಹೆಚ್ಚು ಭಕ್ತರು ಅರುಣಾಚಲ ಪ್ರದೇಶದ ತವಾಂಗ್ ಮಠಕ್ಕೆ ಭೇಟಿ ನೀಡಿದ್ದಾರೆ. ನವೆಂಬರ್ 7ರವರೆಗೆ ಸಾರ್ವಜನಿಕರಿಗೆ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿದೆ.

ನವದೆಹಲಿಯ ರಾಷ್ಟ್ರೀಯ ವಸ್ತುಸಂಗ್ರಹಾಲಯದಿಂದ ತರಲಾದ ಈ ಅವಶೇಷಗಳು 13 ವರ್ಷಗಳ ಬಳಿಕ ಅರುಣಾಚಲ ಪ್ರದೇಶಕ್ಕೆ ಮರಳಿವೆ. ತವಾಂಗ್ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶಗಳ ಬೌದ್ಧ ಸನ್ಯಾಸಿಗಳು, ಸನ್ಯಾಸಿನಿಯರು ಹಾಗೂ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ.

ಈ ಪವಿತ್ರ ಅವಶೇಷಗಳನ್ನು 1898ರಲ್ಲಿ ಉತ್ತರ ಪ್ರದೇಶದ ಪಿಪ್ರಾಹ್ವಾದಲ್ಲಿ ಪತ್ತೆಹಚ್ಚಲಾಗಿತ್ತು. ಬೌದ್ಧ ಧರ್ಮದ ಇತಿಹಾಸ ಮತ್ತು ಪರಂಪರೆಯಲ್ಲಿ ಅವು ಮಹತ್ವದ ಸ್ಥಾನ ಹೊಂದಿವೆ.

ಬೌದ್ಧ ಪರಂಪರೆಯ ವಿಶೇಷ ಪ್ರದರ್ಶನ

ಅವಶೇಷಗಳ ದರ್ಶನದ ಜತೆಗೆ ತವಾಂಗ್ ಮಠದಲ್ಲಿ ಎರಡು ವಿಶೇಷ ಪ್ರದರ್ಶನಗಳನ್ನು ಆಯೋಜಿಸಲಾಗಿದೆ. ಅಂತರರಾಷ್ಟ್ರೀಯ ಬೌದ್ಧ ಒಕ್ಕೂಟದ ‘ಅನ್‌ಅರ್ಥಿಂಗ್ ದಿ ಸೇಕ್ರೆಡ್ ಪಿಪ್ರಾಹ್ವಾ’ ಪ್ರದರ್ಶನವು ಅವಶೇಷಗಳ ಪತ್ತೆ ಮತ್ತು ಇತಿಹಾಸವನ್ನು ಪರಿಚಯಿಸುತ್ತದೆ. ರಾಷ್ಟ್ರೀಯ ವಸ್ತುಸಂಗ್ರಹಾಲಯದ ‘ಕ್ರಾಸ್‌ರೋಡ್ಸ್ ಆಫ್ ಧಮ್ಮ’ ಪ್ರದರ್ಶನವು ಬೌದ್ಧ ಕಲೆ, ಸಂಸ್ಕೃತಿ ಮತ್ತು ಸಂಪ್ರದಾಯಗಳನ್ನು ಅನಾವರಣಗೊಳಿಸುತ್ತದೆ.

ತವಾಂಗ್ ಬಳಿಕ ನವೆಂಬರ್ 8ರಿಂದ 13ರವರೆಗೆ ಬೊಮ್ಡಿಲ್ಲಾದ ಟಿಜಿಎಲ್ ಮಠದಲ್ಲಿ ಹಾಗೂ ನವೆಂಬರ್ 14ರಿಂದ 20ರವರೆಗೆ ನಮಸೈನ ಗೋಲ್ಡನ್ ಪಗೋಡಾದಲ್ಲಿ ಅವಶೇಷಗಳನ್ನು ಪ್ರದರ್ಶಿಸಲಾಗುತ್ತದೆ. ನವೆಂಬರ್ 21ರಂದು ಅವು ನವದೆಹಲಿಯ ರಾಷ್ಟ್ರೀಯ ವಸ್ತುಸಂಗ್ರಹಾಲಯಕ್ಕೆ ಮರಳಲಿವೆ.

ಕೇಂದ್ರ ಸಂಸ್ಕೃತಿ ಸಚಿವಾಲಯವು ಅಂತರರಾಷ್ಟ್ರೀಯ ಬೌದ್ಧ ಒಕ್ಕೂಟ ಮತ್ತು ಅರುಣಾಚಲ ಪ್ರದೇಶ ಸರ್ಕಾರದ ಸಹಯೋಗದಲ್ಲಿ ಈ ಪ್ರದರ್ಶನ ಆಯೋಜಿಸಿದೆ. ಬೌದ್ಧ ಪರಂಪರೆಯ ಜತೆಗೆ ಶಾಂತಿ, ಕರುಣೆ ಮತ್ತು ಸಾರ್ವತ್ರಿಕ ಸಹೋದರತ್ವದ ಸಂದೇಶವನ್ನು ಸಾರುವುದು ಇದರ ಉದ್ದೇಶವಾಗಿದೆ.