ಭಾರತೀಯ ರೈಲ್ವೆಯೊಂದಿಗೆ ಕೊಂಕಣ ರೈಲ್ವೆ ವಿಲೀನ ನಾಲ್ಕು ರಾಜ್ಯಗಳ ನಿರ್ಧಾರವನ್ನು ಅವಲಂಭಿಸಿದೆ..!

ನವದೆಹಲಿ: ಭಾರತೀಯ ರೈಲ್ವೆಯೊಂದಿಗೆ ಕೊಂಕಣ ರೈಲ್ವೆ ಕಾರ್ಪೊರೇಷನ್ ಲಿಮಿಟೆಡ್ (ಕೆ ಆರ್‌ ಸಿ ಎಲ್) ಅನ್ನು ವಿಲೀನಗೊಳಿಸುವುದು ಕೆ ಆರ್‌ ಸಿ ಎಲ್ ನಲ್ಲಿ ಪಾಲು ಹೊಂದಿರುವ ನಾಲ್ಕು ರಾಜ್ಯ ಸರ್ಕಾರಗಳ ಮೇಲೆ ಅವಲಂಬಿತವಾಗಿದೆ ಎಂದು ರೈಲ್ವೆ ಸಚಿವ ಆಶ್ವಿನಿ ವೈಷ್ಣವ್‌ ಸ್ಪಷ್ಟಪಡಿಸಿದ್ದಾರೆ.

ಲೋಕಸಭೆಯಲ್ಲಿ ಬಿಜೆಪಿ ಸದಸ್ಯ ಕೋಟಾ ಶ್ರೀನಿವಾಸ ಪೂಜಾರಿ ಅವರ ಪ್ರಶ್ನೆಗೆ ನೀಡಿದ ಲಿಖಿತ ಉತ್ತರದಲ್ಲಿ ಮಾಹಿತಿ ನೀಡಿರುವ ಸಚಿವರು,ಕೊಂಕಣ ರೈಲ್ವೆ ಕಾರ್ಪೊರೇಷನ್ ಲಿಮಿಟೆಡ್ (ಕೆ ಆರ್‌ ಸಿ ಎಲ್) ಅನ್ನು ರೈಲ್ವೆ ಸಚಿವಾಲಯ, ಮಹಾರಾಷ್ಟ್ರ ಸರ್ಕಾರ, ಗೋವಾ ಸರ್ಕಾರ, ಕರ್ನಾಟಕ ಸರ್ಕಾರ ಮತ್ತು ಕೇರಳ ಸರ್ಕಾರದ ಪಾಲುದಾರಿಕೆಯೊಂದಿಗೆ 1990ರಲ್ಲಿ ಸ್ಥಾಪಿಸಲಾಯಿತು, ಕೊಂಕಣ ರೈಲ್ವೆ ಮಾರ್ಗವು ಮಹಾರಾಷ್ಟ್ರದ ರೋಹಾದಿಂದ ಕರ್ನಾಟಕದ ತೋಕೂರಿನವರೆಗೆ ವಿಸ್ತರಿಸಿದ್ದು, ಪಶ್ಚಿಮ ಘಟ್ಟಗಳ ಕಠಿಣ ಭೂಪ್ರದೇಶವನ್ನು ಹಾದುಹೋಗುತ್ತದೆ. ಭಾರತ ಸರ್ಕಾರ (ರೈಲ್ವೆ ಸಚಿವಾಲಯದ ಮೂಲಕ) ಶೇ.66.35, ಮಹಾರಾಷ್ಟ್ರ ಸರ್ಕಾರ ಶೇ.15.11, ಕರ್ನಾಟಕ ಸರ್ಕಾರ ಶೇ.10.30, ಗೋವಾ ಸರ್ಕಾರ ಶೇ. 4.12 ಮತ್ತು ಕೇರಳ ಸರ್ಕಾರ ಶೇ. 4.12 ರಷ್ಟು ಪಾಲು ಹೊಂದಿವೆ ಹಾಗಾಗಿ ಭಾರತೀಯ ರೈಲ್ವೆಯೊಂದಿಗೆ ಕೊಂಕಣ ರೈಲ್ವೆ ಕಾರ್ಪೊರೇಷನ್ ಲಿಮಿಟೆಡ್ (ಕೆ ಆರ್‌ ಸಿ ಎಲ್) ಅನ್ನು ವಿಲೀನಗೊಳಿಸುವುದು ಕೆ ಆರ್‌ ಸಿ ಎಲ್ ನಲ್ಲಿ ಪಾಲು ಹೊಂದಿರುವ ನಾಲ್ಕು ರಾಜ್ಯ ಸರ್ಕಾರಗಳ ಮೇಲೆ ಅವಲಂಬಿತವಾಗಿದೆ ಎಂದರು.

ಪ್ರಸ್ತುತ, ಮಂಗಳೂರು – ಮುಂಬೈ ವಲಯವು 28 ಜೋಡಿ ರೈಲು ಸೇವೆಗಳನ್ನು ಒದಗಿಸುತ್ತಿದ್ದರೆ, ಮಂಗಳೂರು – ಮಡಗಾಂವ್ ವಲಯವು ಪ್ರಸ್ತುತ 33 ಜೋಡಿ ರೈಲು ಸೇವೆಗಳನ್ನು ಒದಗಿಸುತ್ತಿದೆ.ಭಾರತೀಯ ರೈಲ್ವೆ ಜಾಲದಲ್ಲಿ ಪ್ರಸ್ತುತ 164 ವಂದೇ ಭಾರತ್ ರೈಲು ಸೇವೆಗಳು ಕಾರ್ಯಾಚರಣೆ ನಡೆಸುತ್ತಿವೆ. ಇವುಗಳಲ್ಲಿ, ರೈಲುಗಳ ಪ್ರಾರಂಭ ಅಥವಾ ಅಂತ್ಯದ (originating/terminating) ಆಧಾರದ ಮೇಲೆ ವಿವಿಧ ರಾಜ್ಯಗಳಿಗೆ ಸೇವೆಗಳನ್ನು ಒದಗಿಸಲಾಗುತ್ತಿದೆ ಎಂದು ಮಾಹಿತಿ ನೀಡಿದ್ದಾರೆ.

ರೈಲ್ವೆ ವಿವರ:

· ಮಹಾರಾಷ್ಟ್ರ: ರಾಜ್ಯದ ವಿವಿಧ ನಿಲ್ದಾಣಗಳಿಗೆ 24 ವಂದೇ ಭಾರತ್ ಸೇವೆಗಳು ಲಭ್ಯವಿವೆ.

· ಕರ್ನಾಟಕ: ಕರ್ನಾಟಕದ ವಿವಿಧ ನಿಲ್ದಾಣಗಳಿಗೆ 22 ಸೇವೆಗಳು ಲಭ್ಯವಿವೆ.

· ಕೇರಳ: ಈ ರಾಜ್ಯದಲ್ಲಿ 6 ಸೇವೆಗಳು ಲಭ್ಯವಿವೆ.

· ಗೋವಾ: ಗೋವಾದಲ್ಲಿ 4 ಸೇವೆಗಳು ಲಭ್ಯವಿವೆ.

ಈ ಪಟ್ಟಿಯಲ್ಲಿ ಮಂಗಳೂರು-ಮಡಗಾಂವ್ ಮತ್ತು ಮಡಗಾಂವ್-ಮುಂಬೈ ನಿಲ್ದಾಣಗಳ ನಡುವೆ ಸಂಚರಿಸುವ ವಂದೇ ಭಾರತ್ ರೈಲುಗಳು ಸಹ ಸೇರಿವೆ.

ಕೊಂಕಣ ರೈಲ್ವೆಯ ವ್ಯಾಪ್ತಿಯಲ್ಲಿರುವ ಒಟ್ಟು 739 ಕಿಲೋಮೀಟರ್ ಮಾರ್ಗದಲ್ಲಿ, ರೋಹಾ-ವೀರ್ ಮತ್ತು ಮಡಗಾಂವ್-ಮಜೋರ್ಡಾ ವಿಭಾಗಗಳ ನಡುವಿನ ಸುಮಾರು 55 ಕಿಲೋಮೀಟರ್ ಮಾರ್ಗವನ್ನು ಈಗಾಗಲೇ ದ್ವಿಪಥಗೊಳಿಸಲಾಗಿದೆ. ಉಳಿದ 685 ಕಿಲೋಮೀಟರ್ ಮಾರ್ಗದ ಸಾಮರ್ಥ್ಯವನ್ನು ಹೆಚ್ಚಿಸಲು ದ್ವಿಪಥಗೊಳಿಸುವ ಅಗತ್ಯವಿದೆ. ಇದಕ್ಕೆ ದೊಡ್ಡ ಪ್ರಮಾಣದ ಹೂಡಿಕೆಯ ಅಗತ್ಯವಿದ್ದು, ಎಲ್ಲಾ ಪಾಲುದಾರ ರಾಜ್ಯ ಸರ್ಕಾರಗಳ ಕೊಡುಗೆಯೂ ಬೇಕಾಗುತ್ತದೆ. ಕೊಂಕಣ ರೈಲ್ವೆ ಕಾರ್ಪೊರೇಶನ್ ಲಿಮಿಟೆಡ್ ನಲ್ಲಿನ ಬಂಡವಾಳ ವೆಚ್ಚಕ್ಕಾಗಿ, ಆಯಾ ರಾಜ್ಯ ಸರ್ಕಾರಗಳು ತಮ್ಮ ಪಾಲಿನ ಕೊಡುಗೆಯನ್ನು ನೀಡುವಂತೆ ರೈಲ್ವೆ ಸಚಿವಾಲಯವು ಸಂಬಂಧಪಟ್ಟ ರಾಜ್ಯ ಸರ್ಕಾರಗಳನ್ನು ಕೋರಲಾಗಿದೆ. ಈ ಮಧ್ಯೆ, ಮಾರ್ಗದ ಸಾಮರ್ಥ್ಯವನ್ನು ಹೆಚ್ಚಿಸುವ ಸಲುವಾಗಿ ಗುರುತಿಸಲಾದ ವಿಭಾಗಗಳ (ಸುಮಾರು 263 ಕಿ.ಮೀ.) ದ್ವಿಪಥಗೊಳಿಸುವಿಕೆಗೆ ಸಂಬಂಧಿಸಿದಂತೆ ಸವಿಸ್ತಾರವಾದ ಯೋಜನಾ ವರದಿ (ಡಿಪಿಆರ್) ಸಿದ್ಧಪಡಿಸುವ ಕಾರ್ಯವನ್ನು ಕೊಂಕಣ ರೈಲ್ವೆ ಕಾರ್ಪೊರೇಶನ್ ಲಿಮಿಟೆಡ್  ಕೈಗೆತ್ತಿಕೊಂಡಿದೆ. ಇದಲ್ಲದೆ, ಯಾವುದೇ ರೈಲ್ವೆ ಯೋಜನೆಯ ಮಂಜೂರಾತಿಯು ಈ ಕೆಳಗಿನವುಗಳನ್ನು ಒಳಗೊಂಡಂತೆ ಹಲವು ಮಾನದಂಡಗಳು ಅಥವಾ ಅಂಶಗಳ ಮೇಲೆ ಅವಲಂಬಿತವಾಗಿರುತ್ತದೆ ಎಂದು ಉತ್ತರಿಸಿದ್ದಾರೆ.

ಯಾವುದೇ ರೈಲ್ವೆ ಯೋಜನೆಯ ಮಂಜೂರಾತಿಯು ಈ ಕೆಳಗಿನ ಮಾನದಂಡಗಳನ್ನು ಅವಲಂಬಿಸಿರುತ್ತದೆ:

ಉದ್ದೇಶಿತ ಮಾರ್ಗದಲ್ಲಿ ನಿರೀಕ್ಷಿತ ಸಂಚಾರದ ಪ್ರಮಾಣ ಮತ್ತು ಆ ಯೋಜನೆಯಿಂದ ಬರಬಹುದಾದ ಆದಾಯ.

ಯೋಜನೆಯು ಒದಗಿಸುವ ಮೊದಲ ಮತ್ತು ಕೊನೆಯ ಹಂತದ ಸಂಪರ್ಕ ವ್ಯವಸ್ಥೆ.

ಬಿಟ್ಟುಹೋದ ಪ್ರದೇಶಗಳನ್ನು ಜೋಡಿಸುವುದು ಮತ್ತು ಹೆಚ್ಚುವರಿ ಮಾರ್ಗವನ್ನು ಒದಗಿಸುವುದು.

ಅತಿಯಾದ ದಟ್ಟಣೆ ಇರುವ ಅಥವಾ ಪೂರ್ಣ ಪ್ರಮಾಣದಲ್ಲಿ ಬಳಕೆಯಾಗುತ್ತಿರುವ ಮಾರ್ಗಗಳ ವಿಸ್ತರಣೆ .

ರಾಜ್ಯ ಸರ್ಕಾರಗಳು, ಕೇಂದ್ರ ಸಚಿವಾಲಯಗಳು ಮತ್ತು ಸಾರ್ವಜನಿಕ ಪ್ರತಿನಿಧಿಗಳು ಸಲ್ಲಿಸಿದ ಬೇಡಿಕೆಗಳು.

ರೈಲ್ವೆಯ ಕಾರ್ಯಾಚರಣೆಯ ಅಗತ್ಯತೆಗಳು.ಸಾಮಾಜಿಕ-ಆರ್ಥಿಕ ಅಂಶಗಳು ಹಾಗು ಒಟ್ಟಾರೆಯಾಗಿ ಅನುದಾನ ಅಥವಾ ನಿಧಿಯ ಲಭ್ಯತೆ.