“ಮಾಲೀಕತ್ವ ಬದಲಾಗಬಹುದು, ಆದರೆ RCB ನನ್ನ DNA ನಲ್ಲಿದೆ!” – ಆರ್‌ಸಿಬಿ ಮಾರಾಟದ ಬೆನ್ನಲ್ಲೇ ವಿಜಯ್ ಮಲ್ಯ ಭಾವುಕ ಪೋಸ್ಟ್!

ಬೆಂಗಳೂರು: “ಕಾಲ ಬದಲಾಗಬಹುದು, ಮಾಲೀಕರು ಬದಲಾಗಬಹುದು.. ಆದರೆ ಕೆಲವು ನೆನಪುಗಳು ಮತ್ತು ಸಂಬಂಧಗಳು ಎಂದಿಗೂ ಬದಲಾಗುವುದಿಲ್ಲ.” ಇದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಸಂಸ್ಥಾಪಕ ವಿಜಯ್ ಮಲ್ಯ ಅವರು ತಂಡದ ಬೃಹತ್ ಮಾರಾಟದ ನಂತರ ಹಂಚಿಕೊಂಡಿರುವ ಮನದಾಳದ ಮಾತುಗಳು.

ಸುಮಾರು ₹16,660 ಕೋಟಿ ಮೊತ್ತಕ್ಕೆ ಆರ್‌ಸಿಬಿ ತಂಡವು ಆದಿತ್ಯ ಬಿರ್ಲಾ ಸಮೂಹ ಮತ್ತು ಇತರರ ಒಕ್ಕೂಟಕ್ಕೆ ಹಸ್ತಾಂತರವಾದ ಬೆನ್ನಲ್ಲೇ, ಲಂಡನ್‌ನಿಂದ ಮಲ್ಯ ಅವರು ಮಾಡಿರುವ ಸರಣಿ ಪೋಸ್ಟ್‌ಗಳು ಈಗ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿವೆ.

ಅಂದು ಹೀಯಾಳಿಸಿದವರಿಗೆ ಇಂದು ಉತ್ತರ:

ತಮ್ಮ ಪೋಸ್ಟ್‌ನಲ್ಲಿ ಹಳೆಯ ದಿನಗಳನ್ನು ಮೆಲುಕು ಹಾಕಿರುವ ಮಲ್ಯ, “2008ರಲ್ಲಿ ನಾನು ₹450 ಕೋಟಿ ನೀಡಿ ಈ ಫ್ರಾಂಚೈಸಿಯನ್ನು ಖರೀದಿಸಿದಾಗ, ಹಲವರು ನನ್ನನ್ನು ನೋಡಿ ನಕ್ಕಿದ್ದರು. ಅದೊಂದು ‘ವೆನಿಟಿ ಪ್ರಾಜೆಕ್ಟ್’ (ಕೇವಲ ಪ್ರದರ್ಶನದ ವಸ್ತು) ಎಂದು ಟೀಕಿಸಿದ್ದರು. ಆದರೆ ಇಂದು ಆ ₹450 ಕೋಟಿಯ ಹೂಡಿಕೆ ₹16,660 ಕೋಟಿಗೆ ಬೆಳೆದು ನಿಂತಿರುವುದು ನನಗೆ ಅತೀವ ತೃಪ್ತಿ ನೀಡಿದೆ. ನನ್ನ ದೂರದೃಷ್ಟಿ ಇಂದು ನಿಜವಾಗಿದೆ” ಎಂದು ಹೆಮ್ಮೆಯಿಂದ ಬರೆದುಕೊಂಡಿದ್ದಾರೆ.

ವಿರಾಟ್ ಕೊಹ್ಲಿ ಮತ್ತು ಆರ್‌ಸಿಬಿ ನಂಟು:

ಆರ್‌ಸಿಬಿ ಅಂದ್ರೆ ಬರಿ ತಂಡವಲ್ಲ, ಅದೊಂದು ಭಾವನೆ ಎನ್ನುವುದನ್ನು ಮಲ್ಯ ಬಿಚ್ಚಿಟ್ಟಿದ್ದಾರೆ. “ಆರ್‌ಸಿಬಿ ಸದಾ ನನ್ನ ಡಿಎನ್‌ಎ (DNA) ಭಾಗವಾಗಿ ಉಳಿಯಲಿದೆ. ಹದಿಹರೆಯದ ವಿರಾಟ್ ಕೊಹ್ಲಿಯನ್ನು ತಂಡಕ್ಕೆ ಆಯ್ಕೆ ಮಾಡಿದ್ದು ನನ್ನ ಜೀವನದ ಅತ್ಯಂತ ಹೆಮ್ಮೆಯ ಕ್ಷಣಗಳಲ್ಲಿ ಒಂದು. ತಂಡದ ಯಶಸ್ಸಿನಲ್ಲಿ ಅವರ ಪಾತ್ರ ದೊಡ್ಡದು” ಎಂದು ಕೊಹ್ಲಿ ಜೊತೆಗಿನ ಒಡನಾಟವನ್ನು ನೆನಪಿಸಿಕೊಂಡಿದ್ದಾರೆ.

ಅಭಿಮಾನಿಗಳಿಗೆ ಸಂದೇಶ:

ಬೆಂಗಳೂರಿನ ಅಭಿಮಾನಿಗಳ ಬಗ್ಗೆ ಅಪಾರ ಗೌರವ ವ್ಯಕ್ತಪಡಿಸಿರುವ ಅವರು, “ಬೆಂಗಳೂರಿನ ಸಿಂಹಗಳಾದ ಆರ್‌ಸಿಬಿ ತಂಡಕ್ಕೆ ನಿಮ್ಮ ಬೆಂಬಲ ಹೀಗೆಯೇ ಮುಂದುವರಿಯಲಿ. ಹೊಸ ಮಾಲೀಕತ್ವದ ಅಡಿಯಲ್ಲಿ ತಂಡ ಇನ್ನೂ ಎತ್ತರಕ್ಕೆ ಬೆಳೆಯಲಿ ಎಂದು ಹಾರೈಸುತ್ತೇನೆ” ಎಂದಿದ್ದಾರೆ.

ಸುದ್ದಿಯ ಹಿನ್ನೆಲೆ:

ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (USL) ಒಡೆತನದಲ್ಲಿದ್ದ ಆರ್‌ಸಿಬಿಯನ್ನು ಈಗ ಆದಿತ್ಯ ಬಿರ್ಲಾ ಗ್ರೂಪ್ ನೇತೃತ್ವದ ಒಕ್ಕೂಟ ಖರೀದಿಸಿದೆ. ಈ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಅತಿ ಹೆಚ್ಚು ಮೌಲ್ಯದ ಫ್ರಾಂಚೈಸಿ ಎಂಬ ಹೆಗ್ಗಳಿಕೆಗೆ ಆರ್‌ಸಿಬಿ ಪಾತ್ರವಾಗಿದೆ. ಮಲ್ಯ ಅವರ ಈ ಭಾವುಕ ನುಡಿಗಳು ಆರ್‌ಸಿಬಿ ಅಭಿಮಾನಿಗಳಲ್ಲಿ ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡಿವೆ.