ಬೆಂಗಳೂರು ಸಂಚಾರ ದಟ್ಟಣೆಗೆ ತಂತ್ರಜ್ಞಾನದ ಮುಕ್ತಿ: ವೈಟ್‌ಫೀಲ್ಡ್‌ನಲ್ಲಿ ‘ಟ್ರಾಫಿಕ್ ಸೇಫ್ಟಿ ಗ್ಯಾಲರಿ’ ಆರಂಭ

ಬೆಂಗಳೂರು: ಸಿಲಿಕಾನ್ ಸಿಟಿಯ ಐಟಿ ಹಬ್ ಎಂದೇ ಹೆಸರಾದ ವೈಟ್‌ಫೀಲ್ಡ್‌ನಲ್ಲಿ ಸಂಚಾರ ದಟ್ಟಣೆ ನಿಯಂತ್ರಣ ಮತ್ತು ರಸ್ತೆ ಸುರಕ್ಷತೆಯ ಕುರಿತು ನಾಗರಿಕರಲ್ಲಿ ಜಾಗೃತಿ ಮೂಡಿಸಲು ವಿನೂತನ ಪ್ರಯೋಗವೊಂದನ್ನು ಕೈಗೊಳ್ಳಲಾಗಿದೆ. ಇಲ್ಲಿನ ಪಾರ್ಸೆಕ್‌ (ParSEC) ಕೇಂದ್ರದಲ್ಲಿ ಅತ್ಯಾಧುನಿಕ ‘ಟ್ರಾಫಿಕ್ ಸೇಫ್ಟಿ ಎಕ್ಸ್‌ಪೀರಿಯನ್ಸ್ ಗ್ಯಾಲರಿ’ (ಸಂಚಾರ ಸುರಕ್ಷತಾ ಅನುಭವ ಗ್ಯಾಲರಿ) ಸಾರ್ವಜನಿಕರ ಬಳಕೆಗೆ ಮುಕ್ತವಾಗಿದೆ.

ವೋಲ್ವೋ ಗ್ರೂಪ್ ಇಂಡಿಯಾದ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕರಾದ ಕಮಲ್ ಬಾಲಿ ಅವರು ಈ ವಿನೂತನ ಗ್ಯಾಲರಿಯನ್ನು ಇತ್ತೀಚೆಗೆ ಉದ್ಘಾಟಿಸಿದರು. ಈ ವಿಶೇಷ ಉಪಕ್ರಮದ ಭಾಗವಾಗಿ ಆಯೋಜಿಸಲಾಗಿದ್ದ ‘ಟ್ರಾಫಿಕ್ ಡಿಸೈನ್ ಚಾಲೆಂಜ್’ ಸ್ಪರ್ಧೆಯು ಈಗ ಅಂತಿಮ ಮತ್ತು ಕುತೂಹಲಕಾರಿ ಹಂತಕ್ಕೆ ತಲುಪಿದೆ.

ರಸ್ತೆ ಸುರಕ್ಷತೆಯ ಲೈವ್ ಅನುಭವ

ಇದು ಕೇವಲ ಮಾಹಿತಿ ನೀಡುವ ಪ್ರದರ್ಶನಾಲಯವಲ್ಲ, ಬದಲಿಗೆ ಭೇಟಿ ನೀಡುವವರಿಗೆ ರಸ್ತೆಯ ನೈಜ ಪರಿಸ್ಥಿತಿಯ ಅನುಭವ ನೀಡುವ ಪ್ರಾಯೋಗಿಕ ಕೇಂದ್ರವಾಗಿದೆ. ಚಾಲನೆಯ ಅವಧಿಯಲ್ಲಿ ಸವಾರರು ತೆಗೆದುಕೊಳ್ಳುವ ಸಣ್ಣ ತಪ್ಪು ನಿರ್ಧಾರಗಳು ಎಂತಹ ದೊಡ್ಡ ಅನಾಹುತಗಳಿಗೆ ಕಾರಣವಾಗಬಹುದು ಎಂಬುದನ್ನು ಇಲ್ಲಿ ಸುರಕ್ಷಿತ ವಾತಾವರಣದಲ್ಲೇ ಕಣ್ಣಿಗೆ ಕಟ್ಟುವಂತೆ ತೋರಿಸಲಾಗುತ್ತದೆ. ವಾಹನ ಸವಾರರಲ್ಲಿ ಜವಾಬ್ದಾರಿಯುತ ಚಾಲನಾ ಸಂಸ್ಕೃತಿಯನ್ನು ಬೆಳೆಸುವುದು ಈ ಗ್ಯಾಲರಿಯ ಮುಖ್ಯ ಉದ್ದೇಶವಾಗಿದೆ.

ಅಂತಿಮ ಹಂತದಲ್ಲಿ ‘ಟ್ರಾಫಿಕ್ ಡಿಸೈನ್ ಚಾಲೆಂಜ್’

ನಗರದ ಸಂಚಾರ ಸಮಸ್ಯೆಗಳಿಗೆ ಸಾರ್ವಜನಿಕರಿಂದಲೇ ನವೀನ ಪರಿಹಾರಗಳನ್ನು ಆಹ್ವಾನಿಸಿದ್ದ ಈ ಸ್ಪರ್ಧೆಗೆ ಅಪಾರ ಬೆಂಬಲ ವ್ಯಕ್ತವಾಗಿದೆ. ಈಗಾಗಲೇ ಸಲ್ಲಿಕೆಯಾಗಿದ್ದ ನೂರಾರು ಐಡಿಯಾಗಳ ಪೈಕಿ ಅತ್ಯುತ್ತಮ ಆಲೋಚನೆಗಳನ್ನು ಶಾರ್ಟ್‌ಲಿಸ್ಟ್ ಮಾಡಿ, ಫೈನಲಿಸ್ಟ್‌ಗಳನ್ನು ಪ್ರಕಟಿಸಲಾಗಿದೆ. ಹೊಸ ಐಡಿಯಾಗಳ ಸಲ್ಲಿಕೆ ಪ್ರಕ್ರಿಯೆಯು ಯಶಸ್ವಿಯಾಗಿ ಮುಕ್ತಾಯಗೊಂಡಿದೆ.

ಕಲ್ಪನೆಗೆ ಸಿಗಲಿದೆ ಪ್ರಾಯೋಗಿಕ ರೂಪ

ಆಯ್ಕೆಯಾಗಿರುವ ಫೈನಲಿಸ್ಟ್‌ಗಳು ಪಾರ್ಸೆಕ್‌ ಕೇಂದ್ರದ ವಿಶೇಷ ತಾಂತ್ರಿಕ ವೇದಿಕೆಯಾದ ‘ಪಾರ್ಸೆಕ್‌ ಮೇಕರ್ಸ್‌ಅಡ್ಡಾ’ (ParSEC MakersAdda) ನೆರವಿನೊಂದಿಗೆ ತಮ್ಮ ಆಲೋಚನೆಗಳಿಗೆ ‘ವರ್ಕಿಂಗ್ ಪ್ರೊಟೊಟೈಪ್’ (ಕಾರ್ಯನಿರ್ವಹಿಸುವ ಮಾದರಿ) ರೂಪ ನೀಡುತ್ತಿದ್ದಾರೆ. ಈಗಾಗಲೇ ಸ್ಪರ್ಧಿಗಳಿಂದ ನೈಜ ಮಾದರಿಗಳನ್ನು ಸ್ವೀಕರಿಸಲಾಗಿದ್ದು, ಶೀಘ್ರದಲ್ಲೇ ಸ್ಪರ್ಧೆಯ ಅಂತಿಮ ಫಲಿತಾಂಶಗಳನ್ನು ಪ್ರಕಟಿಸಲಾಗುವುದು ಎಂದು ಪ್ರಕಟಣೆ ತಿಳಿಸಿದೆ.

​ಪರಮ್‌ ಲಿವಿಂಗ್‌ ಲ್ಯಾಬ್‌ನ ಪರಿಕಲ್ಪನೆ:

ಇದರ ಕಲ್ಪನೆ ಮತ್ತು ಕಾರ್ಯಗತಗೊಳಿಸುವಿಕೆಯನ್ನು ‘ಪರಮ್ ಲಿವಿಂಗ್ ಲ್ಯಾಬ್’ ಮಾಡಿದ್ದರೆ, ಇಡೀ ಯೋಜನೆಗೆ ಆರ್ಥಿಕ ಪ್ರಾಯೋಜಕತ್ವವನ್ನು ‘ವೋಲ್ವೋ ಗ್ರೂಪ್ ಟ್ರಸ್ಟ್’ ನೀಡಿದೆ. ಇನ್ನು ತಾಂತ್ರಿಕ ಸಲಹೆಗಾರರಾಗಿ ‘ಬೆಂಗಳೂರು ಟ್ರಾಫಿಕ್ ಪೊಲೀಸ್’ ಇಲಾಖೆಯು ಕೈಜೋಡಿಸಿದೆ.