ನೈಸ್ ಅಕ್ರಮದಲ್ಲಿ ಡಿಕೆಶಿ ಕುಟುಂಬವೇ ನೇರ ಪಾಲುದಾರ: ಸಾಲು ಸಾಲು ದಾಖಲೆ ಬಿಡುಗಡೆ ಮಾಡಿದ ಎಚ್.ಡಿ. ಕುಮಾರಸ್ವಾಮಿ

ಬೆಂಗಳೂರು: ಬೆಂಗಳೂರು-ಮೈಸೂರು ಮೂಲಸೌಕರ್ಯ ಕಾರಿಡಾರ್ (ನೈಸ್) ಯೋಜನೆಯಲ್ಲಿ ನಡೆದಿರುವ ಬೃಹತ್ ಹಗರಣದಲ್ಲಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮತ್ತು ಅವರ ಕುಟುಂಬದವರು ನೇರ ಫಲಾನುಭವಿಗಳಾಗಿದ್ದಾರೆ ಎಂದು ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಗಂಭೀರ ಆರೋಪ ಮಾಡಿದ್ದಾರೆ.

ಬೆಂಗಳೂರಿನಲ್ಲಿ ‘ನಥಿಂಗ್ ನೈಸ್’ ಹೆಸರಿನಲ್ಲಿ ಹಮ್ಮಿಕೊಂಡಿದ್ದ ವಿಶೇಷ ಮಾಧ್ಯಮಗೋಷ್ಠಿಯಲ್ಲಿ ಅವರು ಡಿ.ಕೆ. ಶಿವಕುಮಾರ್ ವಿರುದ್ಧ ನೂರಾರು ಪುಟಗಳ ಅಧಿಕೃತ ಕಡತಗಳು ಹಾಗೂ ಆಡಿಯೋ ಕ್ಲಿಪ್‌ಗಳನ್ನು ಬಹಿರಂಗಪಡಿಸಿದರು.

ಯೋಜನೆಯ ಅಕ್ರಮಗಳ ಕುರಿತು ಕುಮಾರಸ್ವಾಮಿ ಅವರು ಬಿಡುಗಡೆ ಮಾಡಿದ ಪ್ರಮುಖಾಂಶಗಳು ಇಲ್ಲಿವೆ:

₹3 ಲಕ್ಷ ಕೋಟಿ ಮೌಲ್ಯದ ಬೃಹತ್ ಹಗರಣ: ನೈಸ್ ಕಾರಿಡಾರ್ ಯೋಜನೆಯಲ್ಲಿ ನಡೆದಿರುವ ಅಕ್ರಮವು ದೇಶದ ಇತಿಹಾಸದಲ್ಲೇ ಅತಿ ದೊಡ್ಡದಾಗಿದ್ದು, ಸುಮಾರು ₹3 ಲಕ್ಷ ಕೋಟಿ ಮೌಲ್ಯದ್ದಾಗಿದೆ ಎಂದು ಕುಮಾರಸ್ವಾಮಿ ವಾಗ್ದಾಳಿ ನಡೆಸಿದರು. ಡಿ.ಕೆ. ಶಿವಕುಮಾರ್ ಅವರು ಹಿಂದೆ ನಗರಾಭಿವೃದ್ಧಿ ಸಚಿವರಾಗಿದ್ದ ಅವಧಿಯಲ್ಲಿ ಮೂಲ ಒಪ್ಪಂದದ (Framework Agreement) ನಿಯಮಗಳನ್ನು ಗಾಳಿಗೆ ತೂರಿ, ಖಾಸಗಿ ಉದ್ಯಮಿಗೆ ಹಾಗೂ ತಮ್ಮ ಕುಟುಂಬಕ್ಕೆ ಲಾಭ ಮಾಡಿಕೊಟ್ಟಿದ್ದಾರೆ ಎಂದು ಅವರು ದೂರಿದರು.

ಆರ್‌ಟಿಸಿ ದಾಖಲೆಗಳ ಬಹಿರಂಗ: ಶಿವಕುಮಾರ್ ಅವರ ಕುಟುಂಬಕ್ಕೆ ಜಮೀನು ಹಸ್ತಾಂತರವಾಗಿರುವುದನ್ನು ಸಾಬೀತುಪಡಿಸಲು ಕುಮಾರಸ್ವಾಮಿ ಅವರು 26 ಅಧಿಕೃತ ಆರ್‌ಟಿಸಿ (RTC) ಕಡತಗಳನ್ನು ಪ್ರದರ್ಶಿಸಿದರು. ಸರ್ಕಾರದಿಂದ ನೋಟಿಫೈ ಆಗಿದ್ದ ಬೆಂಗಳೂರು ದಕ್ಷಿಣ ತಾಲೂಕಿನ ಕೆಂಗೇರಿ ಹೋಬಳಿಯ ಬಿ.ಎಂ. ಕಾವಲ್ ವ್ಯಾಪ್ತಿಯ ಜಮೀನುಗಳಿಗೆ ನೈಸ್ ಸಂಸ್ಥೆಯು ಕಾನೂನುಬಾಹಿರವಾಗಿ ನಿರಾಕ್ಷೇಪಣಾ ಪತ್ರ (NOC) ನೀಡಿದ್ದು, ಅದನ್ನು ಡಿ.ಕೆ. ಶಿವಕುಮಾರ್, ಅವರ ಪತ್ನಿ, ಪುತ್ರಿ ಮತ್ತು ಸಹೋದರ ಡಿ.ಕೆ. ಸುರೇಶ್ ಹೆಸರಿಗೆ ನೋಂದಣಿ ಮಾಡಿಸಲಾಗಿದೆ ಎಂದು ದಾಖಲೆ ಸಮೇತ ವಿವರಿಸಿದರು.

ಆಸ್ತಿ ಮೌಲ್ಯದ ತೀವ್ರ ಏರಿಕೆ: ನೈಸ್ ಯೋಜನೆಯ ಅಕ್ರಮ ಪಾಲುದಾರಿಕೆಯಿಂದಾಗಿ ಡಿ.ಕೆ. ಶಿವಕುಮಾರ್ ಅವರ ಆಸ್ತಿ ಮೌಲ್ಯವು 2003ರಲ್ಲಿ ಇದ್ದ ₹4 ಕೋಟಿಯಿಂದ 2023ರ ಚುನಾವಣಾ ಅಫಿಡವಿಟ್ ವೇಳೆಗೆ ಬರೋಬ್ಬರಿ ₹1,413 ಕೋಟಿಗೆ ತಲುಪಿದೆ ಎಂದು ಲೇವಡಿ ಮಾಡಿದರು. ಅಲ್ಲದೆ, ಈ ಹಗರಣದ ಭಾಗವಾಗಿ ಶಿವಕುಮಾರ್ ಕುಟುಂಬಕ್ಕೆ ₹2,000 ಕೋಟಿ ಮೌಲ್ಯದ 400 ಫ್ಲ್ಯಾಟ್‌ಗಳು ದಕ್ಕಿವೆ ಎಂದು ಆರೋಪಿಸಿ, ಅಶೋಕ್ ಖೇಣಿ ಮತ್ತು ಡಿಕೆಶಿ ನಡುವಿನದ್ದೆನ್ನಲಾದ ಆಡಿಯೋ ಸಂಭಾಷಣೆಯನ್ನು ಬಿಡುಗಡೆ ಮಾಡಿದರು.

ಫೋರೆನ್ಸಿಕ್ ಆಡಿಟ್‌ಗೆ ಒತ್ತಾಯ: ಹೈಕೋರ್ಟ್ ನಿರ್ದೇಶನದಂತೆ ಈ ಇಡೀ ಯೋಜನೆಯ ಆರ್ಥಿಕ ವಹಿವಾಟಿನ ಕುರಿತು ತಕ್ಷಣವೇ ‘ಫೋರೆನ್ಸಿಕ್ ಆಡಿಟ್’ ತನಿಖೆ ನಡೆಸಬೇಕು ಮತ್ತು ನೈಸ್ ರಸ್ತೆಯನ್ನು ಸರ್ಕಾರ ತನ್ನ ಸುಪರ್ದಿಗೆ ಪಡೆಯಬೇಕು ಎಂದು ಒತ್ತಾಯಿಸಿದ ಕುಮಾರಸ್ವಾಮಿ, ನೈಸ್ ಅಕ್ರಮವನ್ನು ತಡೆಯಲು ಸಾಧ್ಯವಾಗದಿದ್ದರೆ ಡಿ.ಕೆ. ಶಿವಕುಮಾರ್ ಅವರು ತಕ್ಷಣ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಸವಾಲು ಹಾಕಿದರು.